Tapos sa unom ka adlaw, gidala ni Jesus sila si Pedro, si Santiago, ug si Juan ngadto sa usa ka taas nga bukid diin didto walay laing tawo gawas kanila.
Ug samtang nagtan-aw sila kang Jesus, nausab ang iyang panagway, ug ang iyang bisti migilak sa hilabihang kaputi; walay bisan kinsa sa tibuok kalibutan nga makapaputi sama niini. Unya nakita sa tulo ka tinun-an si Elias ug si Moises nga nakigsulti kang Jesus. Ug miingon si Pedro kang Jesus, "Magtutudlo, maayo nga ania kita dinhi. Maghimo kami ug tulo ka payag, usa alang kanimo, usa alang kang Moises, usa alang kang Elias." Nakaingon siya niini kay wala siya mahibalo kon unsay iyang isulti sanglit nangalisan man sila.
Unya dihay panganod nga mitungha ug gilandongan sila niini. Ug may nadungog silang tingog gikan sa panganod nga nag-ingon, "Kini siya mao ang pinagga kong Anak--- Pamati kamo kaniya!" Milingilingi sila pagdali, apan wala silay nakitang tawo gawas lamang kang Jesus.
Sa nanglugsong na sila sa bukid, gipinahan sila ni jesus nga dili nila isugilon kang bisan kinsa ang ilang nakita hangtod nga ang Anak sa Tawo mabanhaw na.
Gituman nila ang iyang gitugon, apan ilang gipanagsultihan kon unsa ang kahulugan sa giingon niyang "Pagkabanhaw". ug ilang gipangutana si Jesus, "Nganong nag-ingon man ang mga magtutudlo sa Balaod nga mouna pag-anhi si Elias?"
Siya mitubag, "Tinood gayod nga si Elias mouna pag-anhi aron pag-andam sa tanang butang. Apan nganong nag-ingon man ang Kasulatan nga ang Anak sa tawo mag-antos pag-ayo ug isalikway? Hinoon, sultihan ko kamo nga si Elias miabot na, ug gibuhat sa mga tawo kaniya ang tanan nga buot nilang buhaton, sumala gayod sa giingon sa Kasulatan."
ANG EBANGHELYO SA GINOO.
DAYGON KO IKAW O CRISTO.
No comments:
Post a Comment