PAGBASA GIKAN SA SANTOS NGA EBANGHELYO SUMALA NI MARCOS (Mk. 6:14-29)
Si Hari Herodes nakadungog niining tanan, kay nasangyaw na man sa tanang dapit ang kabantog ni Jesus. May mga tawo nga miingon, "Nabanhaw si Juan nga Magbubunyag. Mao kini ang hinungdan nga nahimo niya ang mga milagro."
May miingon usab nga siya mao si Elias.
Apan ang uban miingon, "Propeta siya sama sa mga bantogang propeta sa karaang panahon."
Sa pagkadungog ni Herodes sa gibuhat ni Jesus, siya miingon, "Siya mao si Juan nga Magbubunyag nga akong gipapapunggotan, apan nabanhaw."
Si Herodes mismo mao ang nagpadakop, nagpagapos, ug nagpabilanggo kang Juan. Gihimo niya kini tungod kang Herodias nga iyang gipangasawa, bisan kon si Herodias asawa ni Felipe nga iyang igsoon. Kay si Juan god nagpunay mag sulti kang Herodes, "Dili matarong nga makigpuyo ka sa asawa sa imong igsuoon."
Tungod niini, nagdumot si Herodias kang Juan ug naninguha pagpatay kaniya, paan wala siya makahimo niini kay wala man siya tugoti ni Herodes. Nahadlok si Herodes kang Juan kay nasayod man siya nga si Juan maayo ug balaan nga tawo, busa iya siyang gipanalipdan. Gusto ni Herodes mamati kaniya bisan tuod masamok ang iyang hunahuna inigkabati niya sa tanan nga isulti ni Juan.
Sa katapusan nakahigayon ra gayod si Herodias. Nahitabo kadto sa sumad sa adlawng natawhan ni Herodes. Niadtong higayona nagkombira si Herodes ug gidapit niya ang tanang kadagkoan sa kagamhanan, ingon man ang mga pangulo sa kasundalohan, ug ang mga inilang molupyo sa Galilea. Ang anak nga babaye ni Herodias misulod ug misayaw ug nakapahimuot siya ni Herodes ug sa iyang mga bisita. Busa ang hari miingon sa dalagita, "Unsa may imong gusto? Ihatag ko kanimo bisag unsay imong pangayoon." Nakasaad pa gani siya uban ang pagpanumpa nga nag-ingon, "Ihatag ko kanimo ang tanan nga imong pangayoon bisan pag ang katunga sa akong gingharian."
Busa migula ang dalagita ug nangutana sa iyang inahan, "Unsa may akong pangayoon?"
"Ang ulo ni Juan," mitubag ang inahan. Ang dalagita midali pagbalik ngadto sa hari ug miingon, "Ihatag kanako karon dayon ang ulo ni Juan diha sa bandihado."
Nakapasubo kini pag-ayo sa hari, apan wala siya makabalibad tungod sa iyang gipanumpa atubangan sa tanan niyang mga bisita. Busa dihadiha nagsugo siyag usa ka sundalo nga punggotan sa ulo si Juan. Milakaw ang sundalo ug miadto sa bilanggoan ug gipunggotan si Juan. Unya gidala niya ang ulo nga gibutang sa bandihado ug gihatag ngadto sa dalagita, ug gihatag usab kini sa dalagita ngadto sa iyang inahan. Sa pagkadungog sa mga tinun-an ni Juan mahitungod niini, miadto sila ug gikuha nila ang iyang lawas ug gilubong.
ANG EBANGHELYO SA GINOO.
DAYGON KO IKAW, O CRISTO.
UNANG BAGBASA:
PAGBASA GIKAN SA SULAT NGADTO SA MGA HEBREO (Heb. 13:1-8)
Padayona ang inyong paghinigugmaay ingon nga mga igsuon diha kang Cristo. Ayaw kalimot sa pag-abi-abi sa mga dumuduong diha sa inyong balay. May pipila nga naghimo niana ug wala nila hibaloi nga mga anghel diay ang ilang giabi-abi. HInumdomi ang anaa sa bilanggoan sama nga nabilanggo kamo uban kanila. Hinumdumi kadtong nag-antos sama nga nag-antos usab kamo uban kanila.
Angay pasidunggan sa tanan ang kaminyoon, ug dili magmaluibon ang bana ug ang asawa. Hukman sa Dios kadtong makihilawason ug ang manapaw.
Ayaw higugmaa ang salapi; igo na ang anaa kaninyo. Kay nag-ingon ang Dios, "Dili ko gayod kamo biyaan ni talikdan." Busa magmaisogon kita ug moingon,
"Maoy katabang ko ang Ginoo,
Dili ako mahadlok
Kay unsa bay mahimo sa tawo kanako?"
Hinumdomi ang inyong mga panguolo kaniadto nga misulti kaninyo sa mensahe sa Dios. Palandonga giunsa nila pagkinabuhi ug pagpakamatay, ug awata ang ilang pagtuo. Si Jesucristo mao gihapaon kagahapon, karon ug sa walay katapusan.
ANG PULONG SA GINOO.
SALAMAT SA DIOS.
No comments:
Post a Comment