PAGBASA GIKAN SA SANTOS NGA EBANGHELYO SUMALA NI MARCOS (Mk. 6:30-34)
Namalik ang mga apostoles ug nakigkita sila kang Jesus, ug ilang gisugilon kaniya ang tanan nilang nahimo ug natudlo. Daghan kaayo ang mga tawo nga nagpulipuli pagpangabot ug pagpanlakaw; tungod niini si Jesus ug ang iyang mga tinun-an wala nay higayon bisan gani sa pagpangaon. Busa miingon si Jesus sa iyang mga tinun-an,
"Mangadto kita sa dapit nga awaaw aron makapahulay kamog diyotay."
Busa nanakay sila sa usa ka sakayan ug nangadto sa usa ka dapit nga awaaw.
Apan daghang mga tawo ang nakakita sa ilang pagbiya ug nailhan sila dayon; busa ang mga tawo sa tanang lungsod miadto nga nagdagan ug nahiuna pa gani pag-abot sa dapit nga giadtoan ni Jesus ug sa iyang mga tinun-an. Sa pagkawas ni Jesus sa sakayan, nakita niya kining dakong panon sa katawhan ug naluoy siya pag-ayo kanila, kay sama man sila sa mga karnero nga walay magbalantay. Ug gitudloan niya sila sa daghang mga butang.
ANG EBANGHELYO SA GINOO.
DAYGON KO IKAW, O CRISTO.
UNANG PAGBASA:
PAGBASA GIKAN SA SULAT NGADTO SA MGA HEBREO (Heb. 15-17, 20-21)
Busa himoon ta kanunay ang halad sa pagdayeg ngadto sa Dios pinaagi kang Jesus; sa ato pa, pasalamatan ta kanunay sa atong tingog ang iyang ngalan. Ayaw kalimot pagbuhat sa maayo ug pagtinabangay kamo kay mao kini ang mga halad nga makapahimuot sa Dios.
Tahora ang inyong mga pangulo ug tumana ang ilang mga sugo, kay wala silay pahulay sa pag-atiman sa inyong mga kalag, sanglit maghatag man silag husay sa ilang pag-alagad sa Dios. Malipay sila pagtuman sa ilang bulohaton kon tahoron ninyo sila; kay kon dili, masubo sila sa pag-alagad kaninyo, ug kana dili makatabang kaninyo.
Gibanhaw sa Dios si Jesus nga atong Ginoo, nga mao ang Gamhanang Magbalantay sa mga karnero gumikan sa iyang kamatayon, ug pinaagi niini natiman-an ang walay katapusang kasabutan. Ang Dios sa kalinaw maghatag unta kaninyo sa tanang kaayohan nga gikinahanglan ninyo aron pagtuman sa iyang kabubut-on ug pinaagi kang JesuCristo himoon unta niya dinhi kanato ang makapahimuot kaniya. Ug himayaon unta si Cristo hangtod sa kahangtoran! Amen.
ANG PULONG SA GINOO.
SALAMAT SA DIOS.
No comments:
Post a Comment