January 23, 2023, Ebanghelyo, Unang Pagbasa, Ikaduhang Pagbasa

 EBANGHELYO: PAGBASA GIKAN SA SANTOS NGA EBANGHELYO SUMALA NI  MARCOS (MK. 3:22-30)

       Dihay pipila ka mga magtutudlo sa Balaod nga nangabot gikan sa Jerusalem ug sila miingon, "Anaa kaniya si Beelsebul!" Ang uban miingon, "Ang pangulo sa mga yawa maoy naghatag kaniya sa gahom paghingilin sa mga yawa."

    Tungod niini gipaduol ni Jesus ang mga tawo ug gisuginlan siya silag mga sambingay:" "Unsaon man ni Satanas paghingilin kang Satanas? Kon ang mga tawo sa usa ka nasod mag-unay pag-away, mapukan kanang nasora. Kon ang mga sakop sa usa ka panimalay mabahin ug mag-unay pag-away, mabungkag gayod kanang panimalaya. Busa kon ang gingharian ni Satanas magkabahinbahin, dili kini mulongtad, kondili mapukan ug matapos hinoon.

     "Walay makasulod sa balay sa usa ka tawo nga kusgan ug makakawat sa iyang mga kabtangan gawas kon iya unang gapuson ang tawo nga kusgan; unya makahimo na siya pagkawat sa mga butang sa maong tawo."

    "Timan-i ninyo kini: mapasaylo ang mga tawo sa tanan nilang mga sala ug tanang daotan nilang gisulti. Apan ang tawo nga nagsultig daotan batog sa Espiritu Santo dili gayod mapasaylo, kay nakabuhat man siyag sala nga dili gayod mapapas." (Gisulti kini ni Jesus kay may pipila man god ka mga tawo nga miingon nga siya giyawaan.)

ANG EBANGHELYO SA GINOO.

DAYGON KO IKAW, O CRISTO.

UNANG PAGBASA:PAGBASA GIKAN SA SULAT NGADTO SA MGA HEBREO (Heb. 9:15, 24-28)

Tungod niini si Cristo mao ang naghimo sa usa ka bag-ong kasabutan, aron kadtong gitawag sa Dios makadawat sa walay katapusang mga panalangin nga gisaad sa Dios. Mahimo kini tungod kay kamatayon man nga nagluwas sa mga tawo gikan sa mga sala nga nahimo nila samtang ubos pa sila sa unang kasabutan.

    Kay wala mosulod si Cristo sa balaang dapit nga hinimo sa mga tawo nga hulad lamang samatuod nga balaang dapit. Misulod siya sa langit, diin nangatubang siya karon sa Dios alang ug tungod kanato. Ang pangulong pari sa mga Judio mosulod ngadto sa Balaang dapit matag tuig dala ang dugo sa usa ka mananap. Apan wala mosulod si Cristo aron paghalad sa iyang kaugalingon sa makadaghan; kay mag-antos unta siya sa makadaghan sukad pa sa pagbuhat sa kalibutan. Hinonoa, nagpakita siya karon sa makausa ug alang sa tanan sa naghinapos na ang tanang panahon, aron  pagwagtang sa sala pinaagi sa paghalad sa iyang kaugalingon. Kinahanglan mamatay ang tagsatagsa sa makausa, ug tapos niana hukman siya sa Dios. Gihalad usab si Cristo sa makausa aron pagwagtang sa mga sala sa daghang mga tawo. Mopakita siya sa ikaduhang higayon dili tungod sa sala, kondili sa pagluwas kanila nga naghulat kaniya.

ANG PULONG SA GINOO.

SALAMAT SA DIOS