EBANGHELYO: PAGBASA GIKAN SA SANTOS NGA EBANGHELYO SUMALA NI MARCOS (MK. 3:31-35)
Miabot ang inahan ug ang mga igsuong lalaki ni Jesus. Didto sila sa gawas sa balay ug nagpasugo nga buot sila makigkita kaniya. Usa ka pundok sa mga tawo naglingkod libot kang jesus, ug miingon sila kaniya, "Ang imong inahan ug mga igsuon atua sa gawas ug buot sila makigkita kanimo."
Si Jesus mitubag, "Kinsa ba ang akong inahan ug mga igsuon?" Unya mitan-aw si Jesus sa mga tawo nga nag-alirong kaniya ug miingon, "Ania ang akong inahan ug mga igsuon. Kay ang nagtuman sa bisan unsa nga gisugo sa Dios kaniya maoy akong mga igsuon ug akong inahan."
ANG EBANGHELYO SA GINOO.
DAYGON KO IKAW, O CRISTO.
Ang balaod sa mga Judio dili hingpit ug dili sibo nga sumbanan sa tinuod nga mga butang. Landong lamang kini sa maayong mga butang nga umaabot. Ang samang mga halad gihalad kanunay matag tuig. Busa unsaon man sa Balaod paghingpit sa mga tawo nga moduol sa Dios pinaagi niining mga halad? Kon tinuod pang mahinloan sa ilang mga sala ang mga nagsimba sa Dios dili na unta sila mobati nga sad-an gihapon, ug wala na untay mga paghalad nga himoon. Apan pagkakaron ang mga halad nagpa-hinumdom matag tuig sa mga tawo sa ilang mga sala. Kay ang dugo sa mga toro nga baka ug mga kanding dili gayod makawagtang sa mga sala.
Tungod niini, sa dayon nang anhi ni Cristo sa kalibutan, miingon siya sa Dios, "Dili ka buot sa sakripisyo ug mga halad nga mananap, apan giandaman mo ako ug usa ka lawas.
Wala ka mahimuot sa halad nga mga mananap nga gisunog didto sa halaran, O sa mga sakripisyo sa pagwagtang sa mga sala. Unya miingon ako, 'Ania ako, O Dios, aron pagtuman sa buot mong ipabuhat kanako. Busa gisalikway sa Dios ang tanang karaang mga sakripisyo ug giilisan kini sa sakripisyo ni Cristo. Tungod kay gituman ni JesuCristo ang buot ipabuhat sa Dios kaniya, nahinloan kitang tanan sa sala pinaagi sa paghalad sa iyang kaugalingong lawas, sa makausa lamang ug alang sa tanan.
ANG PULONG SA GINOO.
SALAMAT SA DIOS.
No comments:
Post a Comment