January 30, 2023, Santos nga Ebanghelyo

 EBANGHELYO: PAGBASA GIKAN SA SANTOS NGA EBANGHELYO SUMALA NI MARCOS (MK. 5:1-200

Nahiabot sila sa tabok sa lanaw sa Galilea, didto sa yuta sa mga Gerasenhon. Sa pagkawas ni Jesus sa sakayan, gisugat siya og tawo nga gikan sa menteryo. Kining tawhana giyawaan ug nagpuyo sa menteryo, ug wala nay makagapos kaniya bisan pag kadenahan siya. Daghan nang higayon nga gigapos ang iyang tiil ug kamut, apan iya lamang gipamugto ang mga kadena ug gilugti ang mga posas, ug walay tawo nga makapogong kaniya. Adlaw'g gaii magsuroysuroy siya sa mga lubnganan, ug molatas sa mga bungtod nga magsigig singgit ug samad-samaran niya ang iyang lawas sa mga bato. 

Didto pa siya sa layo sa iyang pagkakita ni Jesus, busa midagan siya ngadto kaniya ug miluhod sa iyang atubangan, ug unya misinggit, "Jesus, Anak sa labing halangdon nga Dios, unsa may tuyo mo kanako? Sa ngalan sa Dios, naghangyo ako kanimo, ayaw intawon akog sakita." (Nagsulti siya niini kay giingnan man siya ni jesus, "Espiritu nga dautan, gula niining tawhana!")

Busa nangutana si Jesus kaniya, "Kinsa may imong ngalan?"

Siya mitubag, "Panon, tungod kay daghan kami." Ug nagsigi siyag hangyo kang Jesus nga dili niya papahawaon ang mga dautang espiritu niadtong dapita.

Niadtong higayona may usa ka dakong panon sa baboy nga nanibsib didto sa bakilid. Mihangyo ang mga dautang espiritu kang jesus, "Paadtoa kami nianang dakong baboy ug pasudla kami kanila." Ug iyang gitugotan sila. Migula sa tawo ang mga dautang espiritu ug misulod sa mga baboy. Ug ang tibuok panon sa baboy nga mga duha ka libo mihaguros sa pangpang ngadto sa lanaw ug nangalumos.

Ang mga nag-atiman sa mga baboy nanagan ug ilang gisugilon ang nahitabo ngadto sa mga molupyo sa lungsod ug sa kaumahan. Unya nangadto ang mga tawo aron pagsusi sa nahitabo. Miduol sila kang Jesus ug didto nakita nila nga naglingkod ang tawo nga kaniadto giyawaan. May saput na siya ug nahibalik na kaniya ang maayong pangisip; ug nahadlok silang tanan. Kadtong nakakita sa nahitabo sa tawo nga giyawaan ug sa mga baboy nanugilon niini sa uban.

Busa gihangyo nila si Jesus nga mopahawa siya sa ilang dapit.

Pagsakay ni Jesus sa sakayan, ang tawo nga kaniadto giyawaan nagpakilooy kaniya sa pag-ingon, "Mahimo bang muoban ko kanimo?"

Apan wala mutogot si Jesus. Giingnan hinoon siya, "pauli sa imong panimalay ug siltihi sila unsa kadako ang nahimo sa Ginoo kanimo, ug unsa siya ka maloloy-on kanimo?"

Busa ang tawo milakaw ug miadto sa Decapolis, ug nanugilon mahitungod sa mga butang nga nahimo ni Jesus kaniya; ug nahibulong pag-ayo ang tanan nga nakabati niini.

ANG EBANGHELYO SA GINOO.

SALAMAT SA DIOS.