Santos nga Ebanghelyo, January 20, 2023 (Unang pagbasa, Ikaduhang pagbasa)

UNANG PAGBASA:

PAGBASA GIKAN SA SULAT NGADTO SA MGA HEBREO
HEB. 8:6-13

Apan sumala sa nahitabo, gihatagan si Jesus ug parianong katungdanan nga mas halangdon pa kaayo kay sa ila, ingon nga ang kasabutan nga iyang gihikay tali sa Dios ug sa tawo mas maayo, tungod kay pinasikad man sa mga saad sa labi pang maayong mga butang.

Kon wala paysayop kadtong unang kasabotan, wala unta kinahanglana ang ikaduha. Apan nakakaplag ang Dios ug kasaypanan sa iyang katawhan sa pag-ingon kaniya.

"Nagsingabot ang mga adlaw, nag-ingon ang Ginoo,
Nga naghimo akog bag-ong kasabutan tali kanako ug sa katawhan sa Israel,
Ug sa banay ni Juda.
Dili kini sama sa kasabutan nga gihimo ko tali kanako ug sa ilang mga katigulangan,
Sa adlaw nga giagak ko sila aron mangagiw gikan sa yuta sa Ehipto.
Wala nila tumana ang kasabutan nga gihimo ko tali kanako ug kanila,
Busa wala ko sila panumbalinga, miingon ang Ginoo.

Mao kini ang kasabutan nga himoon ko tali kanako ug sa katawhan sa Israel,

Human niadtong mga adlawa, nag-ingon ang Ginoo,

Ibutang ko ang akong mga balaod diha sa ilang mga hunahuna.

Ug isulat ko kini sa ilang mga kasingkasing.

Mahimo ako nga ilang Dios, ug mahimo sila nga akong katawhan

Ug walay kinahanglan nga magtudlo pa sila sa ilang isigkamolupyo,

Ni may magsulti sa ilang isigkalungsoranon,,

'Ilha ang Ginoo!'

Kay makaila silang tanan kanako, SUkad sa labing ubos hangtod sa labing dako kanila.

Maluoy ako sa ilang mga kalapasan, ug dili ko na hinumdoman ang ilang mga sala."

Sa paghisgot mahitungod sa usa ka bag-ong kasabutan, ang Dios naghimong daan sa una; ug ang tanan nga nagkadaan ug nagkadunot mahanaw sa dili madugay.

ANG PULONG SA GINOO.

SALAMAT SA DIOS.

EBANGHELYO:

PAGBASA GIKAN SA SANTOS NGA EBANGHELYO SUMALA NI MARCOS

MK.3:13-19

Unya mitungas si Jesus sa bungtod ug gitawag niya ang mga tawo nga buot niyang pilion. Nanuol sila kaniya, ug nagpili siyag napulog duha nga iyang gitawag og mga apostoles. Miingon siya kanila, "Gipili ko kamo aron pagwali, ug makabaton kamog gahom sa pag-abog sa mga yawa."

Mao kini sila ang napulog duha nga iyang gipili: Si Simon (ginganlan ni Jesus ug Pedro); si Santiago ug si Juan, mga anak ni Sebedeo (ginganlan sila ni Jesus ug Boanerges, nga sa ato pa, "Mga anak sa Dalugdog"); Si Andres, si Felipe, si Bartolome, si Mateo, si Tomas, si Santiago nga anak ni Alfeo, si Tadeo, si Simon nga patriyota, ug si Judas Iscariote, nga nagbuhdi kaniya.

ANG EBANGHELYO SA GINOO.

DAYGON KO IKAW O KRISTO.