February 10, 2023, Ebanghelyo Bisaya/Cebuano

SANTA ESCOLASTICA, Birhen

Scholastica, a sister of Saint Benedict, was born ni Nursia, Italy about the year 480. She vowed herself to god and followed her brother no Monte Cassino. She died there around the year 547.

PAGBASA GIKAN SA SANTOS NGA EBANGHELYO SUMALA NI MARCOS (Mk. 7:31-37)

Unya mibiya si Jesus sa Yuta duol sa Tiro ug milakaw latas sa Sidon ngadto sa Lanaw sa Galilea, agi sa yuta sa Decapolis. Ug may usa ka tawo nga bungol ug amang nga gidala sa pipila ka mga tawo ngadto kang jesus, ug mihangyo sila kaniya nga ang iyang kamut itapion niya sa tawo, ug gikulkog niya ang iyang mga tudlo sa dalunggan sa tawo. Unya gituthoan niya ang iyang mga tudlo ug iyang gihikap ang dila sa tawo. ug mihangad si Jesus sa langit, nanghupaw siya, ug miingon sa tawo, "Efata" nga sa ato pa, "Maabli ka!"

February 9, 2023, Salmo Responsoryo

TUBAG:

BULAHAN SILA NGA MAHADLOKON SA GINOO.

Bulahan ikaw nga mahadlokon sa Ginoo,/ nga nagalakaw sa iyang kadalanan!/ Kay magakaon ka sa bunga sa imong binuhatan;/ mabulahan gayod ikaw ug mapanalanginan.

TUBAG:

BULAHAN SILA NGA MAHADLOKON SA GINOO.

Ang imong asawa mahisama sa usa ka mabungahon nga bagon/ nga anaa sa tugkaran sa imong balay;/ Ang imong mga anak sama sa mga tanon sa olibo/ libot sa imong talad.

TUBAG:

BULAHAN SILA NGA MAHADLOKON SA GINOO.

Tan-awa sa ingon niinin panalanginan ang tawo nga mahadlokon sa Ginoo./ Manalangin kanimo ang Ginoo gikan sa Sion:/ makita mo unta ang kabulahanan sa Jerusalem/ sa tanang mga adlaw sa imong kinabuhi.

TUBAG:

BULAHAN SILA NGA MAHADLOKON SA GINOO.

February 9, 2023, Ebanghelyo Bisaya/Cebuano

EBANGHELYO: PAGBASA GIKAN SA SANTOS NGA EBANGHELYO SUMALA NI MARCOS (Mk. 7:24-30)

Unya milakaw si Jesus ug miadto sa kayutaan duol sa siyudad sa Tiro. Misulod siya sa usa ka balay ug dili unta siya buot nga may mahibalo nga siya didto sa sulod, apan wala gayod siya makatago. Dihay usa ka inahan nga may anak nga babaye nga giyawaan. Sa pagkabalita niya mahitungod kang Jesus, miadto dayon siya kaniya ug mihapa sa iyang tiilan. Ang maong babaye usa ka langyaw nga didto matawo sa Fenicia, sa Siria. Iyang gihangyo si Jesus sa paghingilin sa yawa gikan sa iyang anak. Apan si Jesus mitubag, "Kinahanglan unahon pagpakaon ang mga anak; dili maayo nga kuhaon ang pagkaon sa mga anak ug ipakaon sa mga iro."

Mitubag ang babaye, "Apan sir, bisan gai ang mga iro diha ilalom sa lamesa makakaon man sa mumho sa kabataan."

Ug miingon si Jesus kaniya, "Tungod sa imong gisulti makapauli kana; ang yawa migula na gikan sa imong anak!" 

Busa mipauli ang babaye sa ila ug iyang hikaplagan ang iyang anak nga naghigda; wala na diha kaniya ang yawa.

ANG EBANGHELYO SA GINOO.

DAYGON KO IKAW O CRISTO.

February 8, 2023, Salmo Responsoryo

TUBAG:

DAYGA ANG GINOO, KALAG KO

Dayga ang Ginoo, kalag ko!/ O Ginoo, akong Dios, dako gayod ikaw!/ Gisul-oban ikaw sa kahalangdon ug himaya,/ gibistihan diha sa kahayag ingon og usa ka kapa.

TUBAG:

DAYGA ANG GINOO, KALAG KO

Ang tanang mga binuhat nagapaabot kanimo/ aron tagaan mo sila og pagkaon sa igong panahon./ Sa imong paghatag niini kanila, ila kini nga gipundok; sa pagbukhad mo sa imong kamut, napuno siya sa kaayohan.

TUBAG:

DAYGA ANG GINOO, KALAG KO

Kon imong huhaan sila sa ginhawa,/ mangamatay siya ug mobalik sa ilang pagka-abog./ Kon imong ipadala ang imong espiritu, mabuhat sila,/ ug mabag-o ang nawong sa yuta.

TUBAG:

DAYGA ANG GINOO, KALAG KO

February 8, 2023, Ebanghelyo

PAGBASA GIKAN SA SANTOS NGA EBANGHELYO SUMALA NI MARCOS (Mk. 7:13-23)

Unya gipadool pag-usab ni Jesus ang panon sa katawhan, ug miingon siya kanila, "Pamati kamong tanan ug sabta ninyo kini: bisan unsa nga mosulod sa baba sa tawo dili makahugaw kaniya. Ang makahugaw sa tawo mao kadtong  mogula kaniya." 

Sa pagbiya na niya sa panon sa katawhan ug pagsulod sa balay, gipangutana siya sa iyang mga tinun-an mahitungod niining mga panultihona. "Sa inyong panabot sama ra kamo sa uban," mitubag si Jesus kanila. "Wala diay kamu makasabot? Bisan unsa nga mosulod sa baba sa tawo dili makahugaw kaniya, kay kini dili man mosulod sa iyang kasingkasing, kondili ngadto sa iyang tiyan, ug unya mogula usab sa lawas." (Sa pagsulti ni Jesus niini, iyang gipahayag nga mahimong kan-on ang tanang pagkaon.)

Ug mipadayong siya sa pag-ingon, "Ang makahugaw sa tawo mao kadtong mogula kaniya. Kay gikan sa sulod, gikan sa kasingkasing sa tawo, manggula ang mga daotang hunahuna, pagpakighilawas, pagpangawat, pagpatay, pagpanapaw,  pagkaibog, pagpanlimbong, kalaw-ay, kasina, pagbutangbutang, pagpagarbo, ug pagbinuang --- kining tanan naggikan sa sulod sa tawo ug maoy makahugaw kaniya."

ANG EBANGHELYO SA GINOO.

DAYGON KO IKAW O CRISTO.

February 7, 2023, Ebanghelyo

 PAGBASA GIKAN SA SANTOS NGA EBANGHELYO SUMALA NI MARCOS (Mk. 7: 1-13)

Ang mga Pariseo ug pipila sa mga magtutudlo sa Balaod nga gikan sa Jerusalem mialirong kang Jesus. Ug namatikdan nila nga may mga tinun-an ni jesus nga nangaon nga "hugaw" og kamot, sa ato pa, wala sila makapanghunaw sumala sa paagi nga gitudlo sa mga Pariseo nga buhaton sa mga tawo.

(Kay ang mga Judio gud, labi na ang mga Pariseo, nagtuman man sa mga gitudlo sa ilang mga katigulangan. Dili mokoan ang mga Pariseo kon dili una sila makapanghunaw sa hustong paagi, ni mokaon sila ug bisan unsa nga gikan sa merkado kon dili pa nila kini kahugasan. May daghan pang mga sugo nga ilang nadawat ug gituman, ingon pananglit sa hustong paagi sa paghugas sa mga tasa, mga kulon, mga panaksan nga tumbaga, ug mga higdaanan.)

February 7, 2023, Salmo Responsoryo

TUBAG:

O GINOO, AMONG DIOS, PAGKAHIBULONGAN SA IMONG NGALAN DIHA SA TIBUOK KALIBUTAN.

Sa pagtan-aw nako sa imong kalangitan, ang buhat sa imong mga tudlo,/ ang buwan ug ang kabitoonan nga imong gipahiluna - - -/ Unsa ba ang tawo nga nanumbaling  ka man kaniya,/ o ang anak sa tawo nga nagtagad ka man  kaniya?

TUBAG:

O GINOO, AMONG DIOS, PAGKAHIBULONGAN SA IMONG NGALAN DIHA SA TIBUOK KALIBUTAN.

Imo siyang gibuhat nga ubos lamang og diyotay sa mga anghel,/ ug imo siyang gipurongpurongan sa himaya ug kadungganan,. Gihatag mo kaniya ang pagmando sa mga buhat sa imong mga kamut,/ gibutang mo ang tanan ubos sa iyang tiilan.

TUBAG:

O GINOO, AMONG DIOS, PAGKAHIBULONGAN SA IMONG NGALAN DIHA SA TIBUOK KALIBUTAN.

Ang tanang mga karnero ug kabakahan,/ oo, bisan ang mga mananap sa kaumahan,/ Ang mga langgam sa kahanginan, ang mga isda sa  kadagatan,/ ug ang tanan nga nagalangoy sa katubigan.

TUBAG:

O GINOO, AMONG DIOS, PAGKAHIBULONGAN SA IMONG NGALAN DIHA SA TIBUOK KALIBUTAN.