PAGBASA GIKAN SA SANTOS NGA EBANGHELYO SUMALA NI MARCOS (Mk. 8:1-10)
Wala madugay, may laing dakong panon sa mga tawo nga nagkatapok. Sa dihang wala na silay magpakon, gipaduol ni Jesus kaniya ang iyang mga tinun-an ug giingnan niya, "Naluoy ako niining mga tawhana, may tulo na karon ka adlaw nga mikuyog sila kanako, ug wala na silay makaon. Kon papaulion ko sila nga walay kaon, panguyapan sila sa dalan, kay ang uban kanila layo raba ug gigikanan." Nangutana kaniya ang iyang mga tinun-an, "Asa man kita mokuha ug pan dinhi niining awaaw nga dapit nga arang ikapakaon niining mga tawhana?"
"Pila ba ka buok ang inyong pan?" Nangutana si Jesus kanila.
"Pito", mitubag sila. Unya gipalingkod ni Jesus sa yuta ang mga tawo. Gikuha niya ang pito ka Pan ug nagpasalamat sa Dios. Human niini, gipikaspikas niya ang pan ug gihatag ngadto sa iyang mga tinun-an aron ilang iapod-apod sa mga tawo. Gituman kini sa mga tinun-an. Sila may pipila usab ka gagmay'ng isda, ug si Jesus nagpasalamat sa Dios tungod niini. Gisugo niya ang iyang mga tinun-an sa pag-apod-apod niini sa mga tawo. Nangaon ang tanan ug nangabusog ---- mga upat ka libo sila. Ang salin nga nahipos sa mga tinun-an pito ka bukag. Unya gipapauli ni Jesus ang mga tawo, ug misakay dayon siya sa sakayan uban ang iyang mga tinun-an ug miadto sa yuta sa Dalmanuta.
ANG EBANGHELYO SA GINOO.
DAYGON KO IKAW O CRISTO.
UNANG PAGBASA:
PAGBASA GIKAN SA BASAHON SA GENESIS
Apan ang lalaki gitawag sa GINOONG DIOS, "Hain ka ba?"
Ang lalaki mitubag, "Nadungog ko ang imong paglakaw sa tanaman ug giabot akong kahadlok ug mitago ako kay hubo man ako."
"Kinsay nagsulti kanimo nga hubo ka?" nangutana ang Dios. "Mikaon ka ba sa bunga sa kahoy nga gidili ko kanimo?"
Ang lalaki mitubag, "Ang babaye nga gihatag mo kanako maoy naghatag kanako sa bunga sa maong kahoy ug mikaon ako niini."
Ang GINOONG DIOS nangutana sa babaye, "Nganong gibuhat mo man kini?"
Ang babaye mitubag, "Gilanlisan ako sa bitin, busa mikaon ako niini."
Ug ang GINOONG DIOS miingon sa bitin,
'Tungod niini silotan ka;
Ikaw lamang sa tanang mananap ang mahiagom niining tungloha: sukad karon magkamang ka na pinaagi sa imong tiyan, ug magkaon ka nag abog, sa tanang adlaw sa imong kinabuhi. Himoon kong magdinumtanay ikaw ug ang babaye; mahimong kaaway ang tawo ug ang bitin, ug ang iyang kaliwat. Dugmokon niya ang imong ulo ug paakon mo usab ang iyang tikod."
Ug miingon siya sa babaye, "Dugangan ko ang imong kalisdanan inig panamkon mo, ug ang kasakit nga imong bation iningpananak nimo; apan bisan pa niiini, mangandoy ka gihapon sa imong bana, ug siya maoy magbuot kanimo."
Unya miingon siya kang Adan, "Sanglit nagpadani ka man sa imong asawa ug mikaon sa bunga sa kahoy nga gidili ko kanimo, matinunglo ang yuta tungod sa imong gibuhat.
Maghago ka pag-ayo sa tibuok mong kinabuhi una pa kini mohatag ug igong abot alang kanimo.
Moturok sa yuta ang mga sampinit ug mga sagbot alang kanimo, ug mapugos ka pagkaog tanom sa kalasangan. Magpatulo ka sa singot ug maghago pag-ayo una pa mohatag kanimog abot ang yuta hangtod mobalik ka sa yuta nga gigikanan mo.
Hinimo ka gikan sa yuta, ug sa yuta ka pauli."
Ginganlan sa lalaki ang iyang asawa og Eva kay siya man ang inahan sa tanang mga tawo. Ug nagbuhat ang GINOONG Dios alang kang Adan ug kang Eva og mga sapot nga panit sa mga mananap ug gibistihan niya sila.
Unya miingon ang GINOONG Dios, "Karon ang tawo nahisama na kanato ug nahibalo na siya unsay maayo ug dautan. Kinahanglan dili siya tugotan pagkaon sa bunga sa kahoy nga naghatag og kinabuhi aron dili siya magpabiling buhi hangtod sa kahangturan." Busa gihinginlan sa GINOONG Dios ang tawo gikan sa tanaman sa Eden ug gipaugmad sa yuta nga iyang gigikanan.
Sa mipahawa na ang tawo, gibutangan sa Dios ang silangan sa tanaman sa Eden ug mga kerubin ug sa usa ka espada nga nagdilaab ug nagtuyoktuyok aron wala makaduol sa kahoy nga naghatag ug kinabuhi.
ANG PULONG SA GINOO.
SALAMAT SA DIOS.
No comments:
Post a Comment